( الفتاة الهاربه ) قصه واقعيه عن بنت كويتيه هربت من الدنيا الى الششارع

** البارت الثالث والعشرون **

الفير كالعاده منار افتحت عينها على احساس لوعة الجبد .. لقت نفسها نايمه على صدر علي طالعته كان نايم ويتنسم بصوت خفيف ..
قامت شوي شوي وانزلت من السرير بدلت ملابسها والبست نفنوف ابيض في قلوب صغار لونهم وردي .. راحت الحمام – عزكم الله – طولت داخل شوي جان ينطق الباب
علي : منور فيج شي ؟
منار : لا مافيني شي
علي : قمت من ربع ساعه ناطرج تطلعين طولتي .. اكيد مافيج شي ؟
منار : ( بطلت الباب ) اي اكيد بس شوي لايعه جبدي غسلت ويهي وتيددت عشان اصلي لاتحاتي مافيني شي
علي : الحمدلله .. انا بعد قايم اصلي
( دش االحمام وطلع صلى وبعدين راح الغرفه لقاها منسدحه و ويهها عالطوف )
علي : ( انسدح وراها ) حياتي نمتي ؟
منار : لا
علي : ( حط ايده على جتفها ) تعبانه ؟
منار : ( لفت عليه ) لا
علي : زين لاتنسين باجر بنروح المستشفى وبنشوفلج دكتوره شاطره عشان تولدج
منار : ( تبتسم ) مو جنه تو الناس عالولاده ؟
علي : اي ادري تو الناس بس لازم تراجعين من الحين عند وحده شاطره
منار : اللي يسمعك يقول متزوج من قبل ومودي مرتك تراجع حق حمالها
علي : ( يظحك ) مو سولفتلج عن حبيبي عمور ؟ عمره الحين 3 سنين ونص واكثر شي كنت انا اللي اودي امي حق مراجعاتها .. ابوي طول عمره مشغول بالشركات واغلب شي مسافر
( منار حست من نبرة صوته ان متضايق )
منار : ( اسكتت شوي ) ... علي انت تركت اهلك بسبتي واتمنى ترجع لهم
علي : والله انا ودي ارجع .. بس ابوي المشكله
منار : روحله مره ثانيه .. يمكن يرضى
علي : ( يتنهد ) لا مالي خلق اصراخه .. الله كريم نامي الحين ولا تفكرين وايد
منار : على راحتك
( علي قلب ونام على ظهره وغمض عينه وقعد يفكر بأهله واحد واحد ومنار تمت اتطالعه واهو مغمض لين نامت )
-------
الصبح عثمان نزل عالية كالعاده عند السور ومشى ..
عالية اقعدت تتلفت بس مالقت احد .. شوي ولا ايي الكورفت دايس وخفف يمها وبطل الدريشه
فهد : اشوه اني لحقت عليج قبل لا تروحين صوب الزحمه
عالية : ( اسكتت وكملت مشيها بس عالبطيء )
فهد : آسف تأخرت بس كنت راح اموت بحادث
عالية : ( لفت عليه ) صج ؟؟
فهد : اي والله .. لف علي باص بغى بذبحني .. المهم يابنت الناس مايصير كل يوم على هالحاله .. اخذي رقمي وكلميني والله ابيج زواج .. بس لازم أول شي اعرف اطباعج وتعرفين اطباعي عشان اقدر اتقدم ويمشي كل شي على خير ..
عالية : ( ماردت عليه )
فهد : زين بعطيج اياه وحفظيه بس اول ماتدشين المدرسه سجليه بورقه ( نقلها الرقم عالبطيء وعاده اكثر من مره وكان الرقم ماسي مكون من 3 ارقام بس فبسرعه احفظته )
فهد : دقي تره اذا مادقيتي انتحر
عالية : ( طالعته بنظره وتقول بقلبها ) الحمدلله والشكر مو صاحي
--------
الساعه 10 الصبح رن تلفون علي جان يقوم لقى منار نايمه وخذه التلفون وطالع الرقم كان رقم بيتهم
علي : الو
ام علي : هلا يمه هلا بحبيبي ولهت على شوفتك ليش مامريت علي ؟ نسيت امك ؟
علي : يمه اشهالكلام ؟ والله انا بعد ولهان عليكم واحد واحد وميت اكثر شي على شوفتج انتي وعمور
ام علي : عيل ليش ما اتيي اليوم انت ومرتك تتغدون عندنا ؟
علي : لا يمه ماقدر .. انتي تعرفين ابوي
ام علي : اهو قال اذا ييت وبست راسه بينسى كل الشي
( منار قامت على صوته جان يطالعها واهو يتكلم ويمسح على شعرها بيده الثانيه )
علي : اعرف ابوي حتى لو رحتله بيطردني ومابي ينصدم بوجودها معاي ويحوشها شي منه
( منار قامت بتطلع من الغرفه عشان ياخذ راحته بالكلام جان يمسك ايدها وأشر لها تقعد يمه .. اقعدت وتمت ساكته تسمعه )
علي : أول انتي قوليله اني راح اكون موجود واهي معاي عشان لا يتفاجئ ويقط علينا كلام
ام علي : ان شاءالله آنا راح اكلمه اليوم وارد لك خبر قبل الغدى
علي : اوكي سلمي عالكل .. مع السلامه
( سكر الخط وشاف منار قاعده وكانت متضايقه )
علي : ( باس راسها ) لاتحاتين والله ماراح يصير الا الخير وبيتصلح كل شي واهلي بيكونون اهلج
منار : ( ابتسمت ) ان شاءالله
علي : يللا قومي بسرعه زهبي نفسج عشان انروح المستشفى
منار : أول بدش اسبح
علي : اوكي ناطرج .. واذا ماطلتي ظهرج آنا موجود
منار : ( طالعته واهي منصدمه )
علي : ( يظحك ) أتغشمر معاج يللا روحي
منار : ( ابتسمت واطلعت )
-------
بالفرصه عالية تمشي يم خلود ومعاهم جم بنت
خلود : ( طقت عالية على جتفها ) عاليو
عالية : ( انتبهت انها كانت سرحانه ) خلوود عورتيني اشتبين ؟
خلود : اللي ماخذ عقلج يتهنى
عالية : ( خزتها ) بس عاد خلود
خلود : ( طالعت البنات ) انتو سلمتو الواجب حق ابله هند ؟
وحده من البنات : اي سلمناه الصبح قبل الطابور
خلود : ويي انا وعالية ماسلمناه امشي نروح لها قبل لا ترصد الدرجات ( اسحبت عالية من ايدها ) عن اذنكم بنات
عالية : تره يبين انج ماتبينهم فشله
خلود : لا مايبين بس لأن انتي تدرين اني مصرفتهم .. المهم قوليلي ليش سرحانه طول اليوم .. تره حتى بالحصص لاحظت انج سرحانه شالسالفه ؟
عالية : صارت اشياء وايد ماتدرين عنها
خلود : ليش اشصار ؟ وليش ما ادري ؟
عالية : ماقدرت ادق عليج امس كانو اعيال عمي عندنا وماراحو الا الساعه 9 وسيده نمت
خلود : زين سماح هالمره .. يللا قوليلي اشصاير ؟
عالية : امس عثمان تأخر علي ... ( وقالت لها اللي صار بالهده )
خلود : وااي يحليله جنتل يهبل
عالية : خلود ؟؟ ( تخزها ) شنو يهبل ؟
خلود : تغارين ها؟
عالية : ويعه شكو اغار بس هم مايصير تقولين يهبل شنو دافع عنج اهو؟
خلود : ( تظحك )
عالية : زين ماكملتلج
خلود : شنو صار بعد ؟
عالية : اليوم الصبح قالي رقمه وقال لو مادقيت بينتحر ( تظحك ) سخيف بس يونس
خلود : ( تظحك ) اي والله يحليله .. دقي قبل لا يموت
عالية : لا ماراح ادق
خلود : ليش ؟ والله مبين ان خوش واحد
عالية : لا اخاف من هالسوالف .. مابي ادق
خلود : عيل عطيني رقمه انا ادق عليه
( طق الجرس وقامو رايحين الصف )
عالية : ماراح اعطيج وماراح ادق
( اظحكو ثنتينهم ودشو الصف )
-------
منار وعلي بمستشفى دار الشفى عند دكتوره هنديه
علي : نبي نتطمن على البيبي وعطيها اشياء تخفف اللوعه كل اليوم الفير تتعب
الدكتوره : تعالي سوي فحص
( خذتها ورا الستاره وافحصت عليها بعدين نادت علي )
منار انحرجت لأن بطنها مكشف والدكتوره قاعده تسوي لها سونار
علي : ( يبتسم وطالع منار يدري انها منحرجه )
الدكتوره : اسمع هذا صوت قلب بيبي .. الحين ماشاءالله انتي شويه يوم يجي ثلاثه شهر
علي : ( يبتسم ويطالع الشاشة ويسمع صوت قلب الياهل ومنار تطالعه ودمعت عينها )
الدكتوره : اي انا اعرف انتي ليش يبجي .. اول مره يسمع قلب بيبي واجد حلو سبحان الله
منار : ( تسمح دموعها ) اي صح وايد حلو
علي : ( يبتسم بس حس بضيقه ومابين لها شي )
علي : متى الولاده ان شاءالله ؟
الدكتوره : انت واجد مستعجل .. ان شاءالله شهر 6
( الدكتوره عطت منار فيتامينات وسجلت لها موعد حق الفحص الثاني )
--------
ابو علي : و اهي بتكون معاه ؟؟؟ لا
ام علي : يا جاسم مهما كان الولد ولدنا عشان خاطري ارضى الله يخليك
ابو علي : اوكي بس لاتتصورين اني برحب فيها
ام علي : يعني اقوله موافق؟؟ اناديه عالغدى ؟؟
ابو علي : ( معصب ) اي ناديه.. يللا مع السلامه ( سكر الخط )
------
- بالسياره –
علي : انتي مابغيتي الا الهنديه ليش يعني؟
منار : مابي يولدني ريال ولا ابي كويتيه او مصريه
علي : ليش يعني اشمعنى هنديه عادي ؟
منار : ( منحرجه ) بس استحي اذا ولدتني كويتيه او اي جنسية عربيه
علي : يعني اهم بشر والهنديه مو بشر
منار : علي عاد خلاص مادري جذي نفسيا ما استحي من الهنديه
علي : ( يظحك ) الحمدلله والشكر ( رن تلفونه )
علي : الو هلا بالغالية
ام علي : اليوم تعالو عالغدى ابوك وافق
علي : اكيد ؟
ام علي : اي والله كلمته قبل شوي قال حياكم
علي : عيل ان شاءالله الساعه وحده انكون عندكم
ام علي : حياكم الله يابعد عمري
علي : ( سكر الخط وطالع منار واهو يبتسم ) اليوم غدانا عند امي
منار : بس انا خايفه مايصير تروح بروحك؟
علي : لا طبعا مايصير
علي : ( باس ايدها واهو يسوق ) لاتخافين حبيبتي محد راح يضايقج
منار : ( ابتسمت واسكتت )

** البارت الرابع والعشرون **
علي : ( سكر الخط وطالع منار واهو يبتسم ) اليوم غدانا عند امي
منار : بس انا خايفه مايصير تروح بروحك؟
علي : لا طبعا مايصير
علي : ( باس ايدها واهو يسوق ) لاتخافين حبيبتي محد راح يضايقج
منار : ( ابتسمت واسكتت )
-------
ام علي قالت حق الطباخ يحضر أنواع مختلفه من السلطات واهي بنفسها حضرت برياني دياي اللي يحبه علي ..
-----
عالية اطلعت بالهده لقت فهد قاعد بسيارته ويطالعها أول ماشافته ابتسم لها
عالية : ( لفت ويهها عنه ) شفتيه ؟
خلود : ( تبتسم ) اي شفته والله ان مسكين كل يوم الصبح وبالهده يطق طريج بس عشان يشوف حضرتج
عالية : اشدراني عنه ؟؟ اكيد عقله فيه شي
خلود : اي صح يمكن منحاش من مستشفى الميانين ولا اشيبي فيج ؟؟
عالية : ( عصبت ) لا والله ؟؟؟
خلود : ( تظحك ) اي وآنا صاجه هد جمالي وراح لج ليش بالله ؟؟ اكيد مينون بعد شنو
عالية : ( اتطالع سيارة اخوها ) زين يا ست الحسن والجمال .. اخوي وصل ولا تطالعين ذاك لا ابط عينج
خلود : لا تحاتين كاهي امي اوصلت يعني ماراح اخطفه منج
( عالية اركبت السياره مع عثمان واهي تسلم على خلود وتطالع فهد )
عالية : اليوم يايني مبجر
عثمان : علي ومرته بيون عندنا عالغدى
عالية : احلف ؟؟
عثمان : والله .. امي قالتلي قبل شوي
عالية : زين وابوي اشلون اقتنع ؟
عثمان : مادري عنه بس اللي اعرفه ان امي اهي اللي اقنعته
عالية : وناسه .. منزمان ودي اشوف شكلها
عثمان : حلوه .. بيضه و شعرها قصير
عالية : ( منصدمه ) انت متى شفتها ؟
عثمان : قبل لا يتزوجها بس لاتقولين حق احد
عالية : يعني كنت تدري ان يحب وحده ويبيها ؟؟؟
عثمان : اي كنت ادري
عالية : يعني علي منصجه يكلم البنت قبل الزواج و ياخذها ؟؟
عثمان : شنو الغلط بعد حبها .. اكيد بياخذها .. انا بصراحه واقف مع علي باللي سواه
عالية : ( اسكتت واقعدت اتفكر بكلامه وبكلام فهد )
------
( منار مرتبكه واتدور شي حلو تلبسه )
علي : منور حبيبتي اشفيج ؟؟ نص ملابس الكبت قاطتهم عالسرير
منار : اي مادري شلبس
علي : كل ملابسج حلوه .. لبسي أي واحد
منار : زين البس تنوره ولا جينز ؟
علي : اكيد تنوره يطلع شكلج احلى
( منار اتطالع الملابس اللي على السرير )
علي : ( قام عشان يختار معاها ) آنا اقول لبسي هذا
منار : لا هذا احسه ضيج ابي شي واسع
علي : كلهم حلوين والله.. اختاري أي واحد بسرعه
منار : ( امسكت نفنوف ) زين هذا حلو ؟
علي : اي وايد حلو يللا لبسي وتزهبي عبال ما اصلي الظهر
( راح علي الصاله ومنار البست نفنوف ناعم حيل لونه اخضر تركواز على ابيض من تحت الصدر يصير واسع وطايح لي تحت الركبه.. جمه لي الكوع و البست بريلها فلات – جوتي واطي من غير كعب – وطلعت اكسسوار قلاده وتراجي – حلق - )
علي دش لغرفه لقاها حاطه مكياج حلو خفيف وقاعده تلبس القلاده
علي : ( وقف وراها و خذه منها القلاده ولبسها اياها ) والله اذا ماحبوج يطلعون ميانين
منار : ( تظحك واتطالعه من المنظره ) على لاتقول جذي هذيله اهلك
علي : ( لمها من خصرها وباس راسها من وره ) اي بعد هذا الصج انتي غصب تنحبين
منار : ( استحت وابتسمت )
علي : يللا خل البس مابقى وقت
( منار تسوي روحها مندمجه تظبط شعرها وكل شوي اتطالعه من المنظره يلبس دشداشه – ثوب – خلص ووقف وراها يطالع المنظره ويلبس الغتره )
منار : ( لفت عليه و تبتسم ) شكلك وايد حلو بالدشداشه
علي : ادري وحده قالتلي هالحجي من قبل
منار : منو قالك ؟
علي : وحده حلوه حيل ماتعرفينها
منار : شنو اول حرف من اسمها ؟
علي : أول حرف من اسمها منار
منار : ( تظحك ) أول حرف منار هاا؟
علي : ( يظحك ويلمها ) اليوم راح تشوفين أهلي وصدقيني راح تحبينهم
منار : ان شاءالله اهم بعد يحبوني
علي : ( وخر عنها و خذا سويج السياره ) يللا نتوكل على الله
منار : ( تبتسم ) يللا
( اركبو السياره واهي طول الطريج خايفه ومابقت سورة قصيره ماقالتها و اهو يسوي روحه مو مرتبك عشان لا تخاف اكثر بس اهو مو متطمن من ردة فعل ابوه )
اوصلو البيت واهم واقفين عند الباب كانت منار حيل خايفه
علي : ( مسك ايدها وضغط عليها ) لاتحاتين ان شاءالله ماراح يصير الا الخير
---
ام علي : ( تنادي من تحت ) عالية .. نزلي يللا الباب ينطق اكيد هذا اخوج تعالي سلمي عليهم
عالية : ( تطل عليها من فوق ) صج اوصلو ؟؟؟ يمه والله خايفه من ابوي يسوي سالفه اهو وينه ؟
ام علي : بغرفته ونزلي يللا بسرعه
---
الخدامه بطلت الباب لهم و علي دش البيت ويمه منار
ام علي : ( دشت الصاله ولمت وباست ولدها ) هلا بالغالي هلا حبيبي
علي : هلا يمه .. ( يطالع منار ) هذي منار جنتج
( ام علي اتطالع منار واهي متضايقه بس ابتسمت عشان لاتحسسها )
ام علي : ( تسلم على منار ويتباوسون ) هلا بنيتي اشلونج ؟
منار : ( تبتسم ويهها صار احمر و حدها مرتبكه ) هلا خالتي الحمدلله بخير انتو اشلونكم؟
ام علي : الحمدلله .. تفضلو حياكم
( اقعدت منار يم علي بالصاله وام علي اقعدت عالقنفه اللي جدامهم و دشت عالية عشان تسلم )
عالية : ( تبتسم ) السلام عليكم
منار : ( اوقفت وسلمت عليها ) وعليكم السلام اكيد انتي عالية
عالية : اي اشلونج ؟
منار : الحمدلله بخير
( عالية سلمت على علي واقعدت يم منار )
علي : يمه عيل عمور وينه ؟؟
ام علي : فوق الخدامه قاعده تكشخه
علي : ( يبتسم ) نزلوه حتى لو مفصخ ابي اشوفه
( الكل ظحك ومنار ابتسمت واتطالعهم وللحين اتحس انها وايد مرتبكه )

** البارت الخامس والعشرون **
علي : يمه عيل عمور وينه ؟؟
ام علي : فوق الخدامه قاعده تكشخه
علي : ( يبتسم ) نزلوه حتى لو مفصخ ابي اشوفه
( الكل ظحك ومنار ابتسمت واتطالعهم وللحين اتحس انها وايد مرتبكه )
بعد شوي نزل عمر مع الخدامه و أول ماشاف علي ركض له وعلي شاله
علي : اهليين بالبطل
عمر : علي حبيييبي لاترووح
علي : ( باس عمر ) اشلونك يالبطل صرت كبيير
عمر : ( يطالع منار ويحط راسه بصدر علي )
علي : ( يظحك ) عموري شوف هذي منار
منار : ( تبتسم وتطالع عمر )
عمر : ( يطالعها ويرد يخش راسه )
علي : ( يظحك ويكلم منار ) ميخالف عطيه ساعه بس وراح يطلعلج قرون
منار : ( تبتسم ) يهبل الله يخليه لكم
( شوي دش عثمان مع ابوه الصاله أول ماشافو ابو علي الكل وقف ومنار حست ريلها ماتشيلها بس غصب واقفه )
ابو علي : ( يطالع منار وعلي وماقال شي )
علي : ( راح يسلم على ابوه ويبوس راسه )
ابو علي : ( بس خلاه يسلم بيده ورجع راسه عشان مايبوسه ) هلا هلا
( علي حس ان انحرج جدامهم وخصوصا من منار لأن كان يبي يشجعها انها تسلم بس الحين اكيد بتخاف اكثر )
منار : ( واقفه واتطالع ابو علي وماتدري اتقرب منه او لأ )
علي : ( مد ايده حق منار ) يبه هذي منار مرتي
ابو علي : ( طالع منار من فوق لي تحت وقال بنفسيه ) هلا
منار : ( ماتجرأت اتمد له ايدها لأن مبين ان مو مرحب فيها من قلب ) هلا عمي
عثمان : ( يبي يلطف الجو ) هلا منار اشلونج ان شاءالله كل شي تمام ؟
منار : ( تبتسم وفيها بجيه من الموقف المحرج ) الحمدلله كل شي بخير انت اشلونك؟
عثمان : الحمدلله
علي تضايق من تصرف ابوه بس سكت وحمد ربه ان ماقالها شي يجرحها شوي حطو الغدى والكل قام الصاله الثانيه اللي فيها طاولة الاكل
منار اقعدت بين علي وعالية وجدامها قاعده ام علي وعثمان وعمور وعلى راس الطاوله قاعد ابو علي
عمر : ابي اقعد اهناك ( يأشر صوب علي )
ام علي : لا اقعد اهني عشان اوكلك خل علي ياكل
علي : ( يبتسم ويطالع منار ) الحين بتذوقين طباخ امي
منار : مبين ان لذيذ من ريحته
( ام علي حطت حق كل واحد بصحن والكل قعد ياكل )
ام علي : ها يمه اشرايك ؟؟ سويتلك الاكله اللي تحبها
علي : تسلم ايدج يا احلى مريومه
ابو علي : عسى مرتك تطبخلك نفس هالطباخ ؟
( منار ابلعت لقمتها غصب واهي منحرجه وودها كلش مايدخلونها بسوالفهم )
علي : ( يبتسم ) اي يبه تطبخ خوش طباخ ماتقصر معاي
ابو علي : ( سكت وكمل اكله )
عالية : منار اشرايج انا وانتي وعلي انروح السوق يقولون منزلين ..
ابو علي : ( زفها ) عالية على كيفج اتقررين بدون شوري ؟
عالية : ( اسكتت وبغت تبجي من الاحراج )
ام علي : حصل خير جاسم البنت ماتقصد ويللا كملو غداكم
( منار ماشالت عينها عن الصحن ماودها اتشوف نظراتهم لها )
علي : ( حط ايده على ايد منار عشان تهدى شوي )
( عمر كان كل شوي يصارخ ويلعب بالاكل وعلي يسولف معاه )
ابو علي : ومتى ان شاءالله اتفكر اتييب ولد ؟
منار : ( كانت تاكل جان تشرق بالعيش واختنقت و اقعدت اتكح )
علي : ( يعطيها ماي ) هاج شربي ماي
ابو علي : اشفيها انا اشقلت ؟
( منار اشربت ماي وهدت بس قالت بتروح الحمام وعالية خذتها وراحو )
ام علي : اشفيك يا جاسم البنت ضيفه عندنا ليش كل شوي تحرجها
ابو علي : اي انا اشقلت؟؟ سألت متى اشوف حفيدي فيها شي ؟
علي : لا يبه مافيها شي وان شاءالله بتشوفه .. الحمدلله ( قام )
بعد الغدى اقعدو بالصاله يسولفون ومنار قاعده يم علي وساكته
ابو علي : انا بتكلم بصراحه ولا تعودت اخش اللي بقلبي
علي : يبه مو وقته الحين
ابو علي : بلى الحين وقته
منار : ( ساكته وودها الارض تنشق وتبلعها )
ابو علي : انت تزوجت وانا مو راضي وخلاص صار اللي صار .. وبالمستقبل اذا احملت مرتك .. ما ابي احفادي يعيشون بعيد عن عيني انا وامك .. الشغل بالشركه ناطرك حلالي اهو حلال اعيالي واحفادي من بعدي
علي : بعد عمر طويل ان شاءالله
ابو علي : فهمت كلامي زين؟؟ يعني طلعه من الشركه ماكو
علي : اهم شي اتكون راضي علي
ابو علي : خلاص صار اللي صار ومشيت كلمتك بس اتمنى اتكون مختار صح
منار : ( نزلت راسها وقلبها يعورها )
علي : ( يمسك ايد منار ) اي يبه ابشرك اخترت صح
ابو علي : ( يقوم من مكانه ) انا رايح ارتاح بغرفتي ( وخلاهم ومشى )
علي : ( يلتفت على امه ) يللا يمه انا ماشي تبين شي ؟
ام علي : ليش بتروح ؟ توك ياي ؟
علي : ميخالف يمه هذي قعدتنا من الصبح وودنا نرتاح
ام علي : غرفتك موجوده وناطرتك روحو ارتاحو فيها
علي : لا يمه بنروح البيت احسن .. انزوركم وقت ثاني ان شاءالله
ام علي : على راحتك
( سلمو عليهم وعمور بجى مايبي علي يروح جان تاخذه عالية عشان تسكته واطلعو علي ومنار )
بالسياره منار ساكته وعلي مايدري شيقول لها
علي : ميخالف هذي اول مره يشوفج عطيه فرصه
منار : ماراح يتقبلني
علي : بلى ابوي مهما عصب وصرخ بس بالنهاية والله قلبه طيب
منار : علي انا آسفه على كل شي سببته لك
علي : منور حبيبتي مابي اسمع هالكلام منج مره ثانيه .. انا ماسويت شي
منار : ( ابتسمت واسكتت طول الطريج )
-------
ام علي : حرام عليك الولد ياي لي عندك وبيبوس راسك احرجته جدامنا وجدام مرته ليش ؟
ابو علي : لأن البنت اللي مدخلها بيتنا مو مربينها اهلها عدل وخله بنت عمه عشان وحده ماعندها اخلاق ؟
ام علي : يا بو علي قص عليهم الشيطان وولدك تصرف وخذاها وباين ان يحبها .. ليش ماتسامحهم ؟
ابو علي : الحين ماسمعتيني قلتله شغله بالشركه ناطره متى مارجع ؟؟ عيل هذا شنو تسمينه ؟؟
ام علي : لا موجذي .. انت لو سامحته من قلبك جان اختلف اسلوبك معاه اهو والبنت
ابو علي : ولدي انا مجبور اسامحه عشان اعياله بيشيلون اسمي .. بس اهي مابي اكلمها ولا اتكون بينا أي صله
----
منار كانت قاعده بالصاله تسفط ملابس الغسيل وكانت طول الوقت سرحانه
علي : ماتبين تنامين شوي ؟
منار : لا روح انت ارتاح انا عندي شغل
علي : اساعدج ؟
منار : ( تظحك ) لا مابقى شي روح ارتاح
علي : ( قعد يمها ) خليهم عنج وتعالي ارتاحي ادري انج تعبانه
منار : ( اسكتت وهدت كل شي وقامت معاه )
( دشو الغرفه وانسدحو واهو قعد يقولها ان كل شي بينحل وقالها قصه البطوط وخلاها تظحك وبعدين نامو )
----
عالية منسدحه بغرفتها وتفكر بفهد ماتدري اتدق عليه او لأ
عالية : ( بقلبها ) لا لا مالي خلق عوار راس جذي انا مرتاحه
----
علي ومنار قامو من النوم عالمغرب وخذاها وطلعها وتمشو ودشو فلم بس هالمره كان فلم حلو واقعدو يسولفون عنه بالطريج وارتاح علي حس ان قدر ينسيها اللي صار اليوم وبالليل ردو تعابى تعشو ونامو..
----
مر يومين و علي مايقرب من منار واهي مستغربه من تصرفه بس ماتتجرأ تقوله شي بهالخصوص
-----
عالية ماقامت تشوف فهد وحست انها متضايقه وماتعرف شالسبب
خلود : اشفيه صارله يومين مو مبين ؟
عالية : مادري عنه .. باجر عطله و مادري يوم الاحد بيكون موجود او لأ
خلود : دام انتي لهالدرجه تحاتينه دقي تطمني عليه
عالية : مادري خايفه
خلود : والله ماينعرفلج
عالية : هذا ابوي وصل .. يللا انا ماشيه
خلود : أي شي يصير قوليلي
عالية : اوكي مع السلامه
---
عالية : يبه ليش ماياني عثمان اليوم ؟
ابو علي : صارت شغله ضروريه خليته يسافر حق الشركه وكلها يومين و ألحقه
عالية : ( اسكتت وللحين اتفكر بفهد )
( أول ماراحو البيت تغدو والكل راح غرفته عشان يرتاح .. بس عالية اقعدت اتفكر وتحاتي فهد لين قررت انها اتدق عليه .. راحت خذت تلفون البيت ودشت غرفتها )
عالية : ( قلبها يرقع وايدها ترجف ودقت رقم فهد )
فهد : الو ؟
عالية : ( ساكته )
فهد : الو ؟؟ منو
عالية : ( غصب تتكلم ) آنا اللي
فهد : عرفتج انتي اللي بالمدرسه عدل
عالية : اي
فهد : هلا والله و اخيرا سمعت صوتج
عالية : ( ساكته )
فهد : الو ؟
عالية : الو .. معاك
فهد : وين معاي ساكته وانا اتكلم بروحي .. عاش من سمع صوتج
عالية : عاشت ايامك
فهد : ماتعرفت عالاسم
عالية : عالية
فهد : عاشت الاسامي وانا اسمي فهد
عالية : ( ساكته )
فهد : داقه تتطمنين علي ؟
عالية : ( منحرجه ) اي
فهد : يعني لو كنت ياي هاليومين ماجان دقيتي صح
عالية : ( ساكته )
فهد : انتي ليش كله تسكتين سولفي معاي والله حاب اسمع سوالفج
عالية : الحمدلله انك بخير انا الحين لازم اسكر التلفون
فهد : ليش ليش ؟ تونا ماتكلمنا
عالية : ماقدر اشغل خط البيت وايد
فهد : ماعندج تلفون ؟
عالية : لا
فهد : انا اييبلج واحد
عالية : لا مشكور مابي
فهد : عيل اشلون اكلمج ؟
عالية : بعدين انا ادق عليك الحين لازم اسكر
فهد : خلاص ناطرج .. مع السلامه عالية
عالية : ( تبتسم و اهي منحرجه ) مع السلامه فهد
( سكرت التلفون ورجعته مكانه ويت انسدحت واهي تفكر فيه وقلبها يرقع من الارتباك )

** البارت السادس والعشرون **
فهد : خلاص ناطرج .. مع السلامه عالية
عالية : ( تبتسم و اهي منحرجه ) مع السلامه فهد
( سكرت التلفون ورجعته مكانه ويت انسدحت واهي تفكر فيه وقلبها يرقع من الارتباك )
------
الصبح فزت منار على صوت قوي كانت الغرفه ظلمه وفيها شوية نور من الدريشه
منار : ( تقعد علي ) علي قوم في صوت قوي جنه شي انفجر
علي : ( يقلب ويعطيها ظهر ) ماكو شي حلم حلم نامي
منار : والله فيه توني سمعـ..
( رجع الصوت قوي مره ثانيه جان يقوم علي ومنار تمت ماسكه شعر ايده )
علي : زين هديني شلعتي شعري
( قام علي وطل من الدريشه وظحك )
علي : ( يظحك ) فديت حبيبتي الخوافه .. أول مره تسمعين صوت الرعد ؟
منار : بس تو الناس عالمطر
علي : لا شنو تو الناس بس خلاص احنا بشهر 12 اصلا المفروض نازل آخر 11
علي : ( واقف عند الدريشه ويطالعها قاعده عالسرير ) خفتي ؟
منار : اي والله عبالي الغاز انفجر
علي : ( يظحك ويروح يبطل الليت ) والله انتي فلم
منار : خلاص عاد لا تتطنز اشدراني خفت
علي : زين انا بروح اسبح وانتي جهزيلنا احلى ريوق
منار : عيل خلني ادش قبلك اغسل وبعدين اسبح
علي : زين يللا روحي
---------
ام علي : عاليوو قومي يللا ابوج ناطرج بنتريق
عالية : يمه خليني انام مابي آكل
ام علي : يللا قومي شنو مابي آكل عثمان مسافر و ابوج مايعرف ياكل ومحد قاعد
عالية : ( قامت ) اففففف
ام علي : ( طقتها على راسها ) شنو اف ؟؟ عيب انا امج
عالية : ( قامت ) زين خلاااص قمت
( بعد شوي انزلت واقعدو اهي وام علي وابو علي يتريقون )
عالية : يبه ؟؟
ابو علي : نعم يبه ؟
عالية : ( تطالع الخبزه اللي بيدها ومتوتره )
ابو علي : تكلمي حبيبتي اشفيج ؟
عالية : يبه ليش كل الناس اللي كبري عندهم تلفون ؟ يعني حتى خلود وندى عندهم
ام علي : وانتي اشتبين فيه عندج تلفون البيت متى ماتبينهم كلميهم
عالية : ( ساكته وتطالع الخبزه )
ابو علي : زين انتي محتاجته بشنو يعني ؟
عالية : يعني ابي اكلم البنات.. اعطيه رفيجاتي انا ما اكلم الا خلود والسبه ماقدر أستخدم تلفون البيت على راحتي كل شوي ياي عثمان وماخذه مني والصراحه انحرج اقول حق البنات ماعندي نقال
ابو علي : يا غالي والطلب ارخيص .. اليوم التلفون والخط يكون عندج
عالية : ( قامت وباست خد ابوها ) مشكوور يا احلى واطيب ابو .. بس يبه قول حق عثمان لا يتحرش فيني انت يبته لي اهو لا يتدخل
ابو علي : مايصير اقول حق اخوج لا تتدخل باختك .. بس انا راح اكلمه والتلفون بالليل يتسكر ويستحسن تخلينه عند امج
عالية : ( تبتسم وتاكل ) اوكي
ام علي : الله يخليك لنا يا جاسم ويطول بعمرك
ابو علي : ويخليكم ان شاءالله
-----
منار وعلي قاعدين يتريقون ويسولفون جان يصير رعد قوي
علي : ( ظحك ) ها خفتي ؟
منار : لا ماخفت وبسك اطنازه
علي : يبيله على هالمطر نتمشى بالشارع ونمسك مظله
منار : ( تظحك ) ونتعلم شوية حركات ونرقص ونسوي فلم هندي
علي : ( يطالعها ويبتسم ) فديت ظحكتج يا بعد روحي
منار : ( استحت ) ذوق خلطة الكيري والطماط والله لذيذ
علي : اي ادري كل شي تسوينه لذيذ ( ياكل )
علي : اليوم بنروح نشتري ملابس حق لشتى خلاص والله بيوم وليله راح ينقلب الجو ويصير ثلج
منار : خلها باجر اليوم قاعده تمطر
علي : ويعني ؟؟ عادي وناسه الجو بالمطر
منار : زين متى انروح ؟
علي : بعد شوي .. وبالمره نتغدى بره
------
عالية اقعدت بالصاله يم التلفون وامها وابوها قاعدين بالصاله الثانية
عالية : ( دقت رقم فهد واهي خايفه ) الو ؟
فهد : صباح الخير على احلى وارق بنت بالدنيا
عالية : ( منحرجه ) اشلونج
فهد : انا زينه
عالية : ( تظحك )
فهد : في احد يمج ؟
عالية : لا بس يمكن اييون
فهد : عيل سكري الحين عشان لا يسمعونج وتصيرلج مشكله
عالية : اوكي مع السلامه
فهد : الله معاج ديري بالج على نفسج واكلي تره انتي ظعيفه وايد
عالية : ( تظحك ) ان شاءالله .. باي
( سكرت الخط واقعدت اتفكر في وباسلوبه )
عالية : ( بقلبها ) يحليله يخاف علي
-----
منار وعلي بالسوق يختارون ملابس وبوتات
منار : ( تظحك وتفصخ الكبوس ) لا مابي وايد كبير.. اشفيني اطلع جذي جني حاطه على راسي شمسيه
علي : بالعكس وايد حلو عليج
منار : لا مابي ماحب
علي : كيفج اشتريه حق حبيبتي هديل اللي بالمطعم
منار : ( اتخزه ) انت للحين تكلمها
علي : لا والله اتغشمر معاج
منار : اي دير بالك
علي : ( يظحك ) هالجاكيت حلو اخذيه
منار : اي وايد حلو
علي : عموما ملابس الشتى وايد احلى من ملابس الصيف حتى لنا احنى الشباب
منار : اي تخليكم رزه
علي : يعني بالصيف انا مو رزه ؟
منار : ( تظحك ) بلى بس بالشتى رزه اكثر
( كملو تسوق وتمشو بعدين تغدو بره و وصلها العصر الشقه وخله مصطفى يصعد الأغراض معاها واهو راح حق ربعه )
----
علي راح حق ربعه العبو جنجفه و يسولفون ومشغلين التلفزيون كان فلم حق جينيفر لوبيز
واحد من الشباب : اخييييه على هالممثله تذبح
علي : ( رفع راسه يطالع وابتسم ماقال شي ورد يطالع الاوراق اللي بيده )
محمد : هااا عليوي المدام مهددتك تقطع عنك المصروف اذا طالعت بنات حتى لو بالتلفزيون؟
علي : ( يظحك ) إلعب وانت ساكت
صلاح : يعني تنصحني اتزوج ؟؟
علي : اي تزوج احسن من الفراره بالشوارع
محمد : شكلك مرتاح عالآخر
علي : تزوج وقولي رايك
محمد : الزواج بس اول شهرين حلو وماودك تطلع من البيت .. بس بعدين خلاص اتمل
( علي ابتسم وقعد يفكر بمنار وان للحين ماحس بطعم الزواج عدل )
علي : شباب تأخر الوقت انا بمشي
محمد : اييي روح قبل لا تقفل الباب
الشباب : ( كلهم اظحكو )
علي : ( ظحك ) اييلك يووم يا بو جاسم.. يللا مع السلامه
( اول ما وصل الشقه دش الغرفه لقاها نايمه بدل ملابسه ولبس شورت وانسدح وراها )
علي : ( باس جتفها ) منور ؟؟
منار : ( لفت عليه وبطلت عينها ) هلا علي الساعه جم
علي : 11 بالليل تأخرت عليج ؟؟
منار : لا بس لأن جهزتلك العشى خل اقوم احطه
علي : ( قعد يلمس خدها ويبتسم ) لا مابي هالعشى
منار : ( قلبها بدى يرقع )
علي : ( باس خشمها ) أحبج
( منار ويهها صار احمر وماقالت شي )
----
عالية : ( تتكلم بالتلفون شوي شوي ) اي اليوم ابوي يابه لي
فهد : كل هذا عشاني فديت عمرج
عالية : ( انحرجت ) بس ماقدر اطول بوديه عند امي بعد شوي
فهد : لا اول سولفيلي عنج وعن اهلج
عالية : شنو تبي تعرف ؟
فهد : يعني .. انتو جم واحد بالبيت و شنو ترتيبج بين اخوانج وخواتج .. جذي يعني
عالية : انا ماعندي خوات وكله اتملل بس قاعده بين 3 صبيان
فهد : من اليوم بصير اختج واخوج و زوجج ان شاءالله
عالية : ( استحت واسكتت )
فهد : فديت اللي يستحون .. يللا كملي شنو ترتيبج بينهم
عالية : أول شي اخوي علي اكبر واحد .. بعدين عثمان .. بعدين انا وآخر شي عمور عمره 3 سنين ونص
فهد : يحليله صغير .. يعني يصير تقريبا كبر اعيال اخوج اذا تزوج
عالية : اي اخوي علي متزوج توه يعني لو مرته يابت ياهل بيصير رفيج عمور
فهد : اكيد كنتي احلى وحده بالعرس
عالية : لا وين .. ماسوينه عرس تزوج فجأه
فهد : ليش؟
عالية : ( اسكتت فتره ) اشدراني عنه
فهد : يعني اهو مايبي عرس ولا الزواج صار بسرعه بسرعه ؟
عالية : اي في سبب خلاه يتزوج بسرعه من غير عرس بس انا مالي شغل فيهم ومابي اتكلم عن الموضوع
فهد : ليش عاد ؟؟ خلينا ناخذ ونعطي افتحيلي قلبج وانا بقولج كل شي عني وعن اهلي واحد واحد
عالية : بس مادري احس ان لازم ما اقول
فهد : لا مافي شي اسمه ما اقول .. انا ابيج تصيرين كتاب مفتوح وانا بعد بفتحلج قلبي وبقولج كل شي
عالية : آنا سمعت امي وابوي يتهاوشون يقولون ان غلط مع البنت عشان جذي خذاها بسرعه
فهد : ( ساكت )
عالية : الو ؟؟ فهد ؟
فهد : معاج معاج
عالية : وين رحت ؟
فهد : مارحت مكان قاعد اسمعج .. بس ابوي ينادي لازم اروح .. يللا نامي نوم العوافي
عالية : اوكي مع السلامه ( سكرت الخط )
( اقفلت الجهاز وودته حق امها وردت نامت )

** البارت السابع والعشرون **

عالية : آنا سمعت امي وابوي يتهاوشون يقولون ان غلط مع البنت عشان جذي خذاها بسرعه
فهد : ( ساكت )
عالية : الو ؟؟ فهد ؟
فهد : معاج معاج
عالية : وين رحت ؟
فهد : مارحت مكان قاعد اسمعج .. بس ابوي ينادي لازم اروح .. يللا نامي نوم العوافي
عالية : اوكي مع السلامه ( سكرت الخط )
( اقفلت الجهاز وودته حق امها وردت نامت )
فهد : ( ماسك التلفون ويطقه بيده الثانيه ) انا بعد بسوي مثلك يا علي بس في فرق صغييير بيني وبينك .. انت صلحت غلطتك بس انا ماراح اصلح غلطتي
-----
الصبح علي قام لقى منار نايمه على صدره ابتسم وحس ان اسعد واحد بالدنيا
علي : ( يمسح على زند منار ) نوم العوافي حياتي
منار : ( افتحت عينها وطالعته لقته يبتسم لها استحت ونزلت راسها )
علي : صباح الخير يا أحلى عروس بالعالم كله
منار : ( تبتسم ) صباح النور
علي : اليوم ريوقنا بالأبراج
منار : ( تبتسم ) اوكي
( منار وخرت عنه تبي تقوم بس ماخلاها مسكها وطالعها بنظره واهو يبتسم )
علي : لا تو الناس مانبي نقوم الحين
-----
ام علي : الله يخليك لنا يا جاسم ولا يحرمنا منك عساك ماتشوف يوم شين .. ريحت قلبي الله يريح قلبك
ابو علي : خلاص عاد لا تخليني اهون
ام علي : ادري ان قلبك طيب ماني قادره اصبر بقوله الحين
ابو علي : قوليله وانا الحين رايح حق بوسالم.. ابي الغدى مطبق زبيدي
ام علي : ان شاءالله من عيوني
----
منار وعلي راحو مطعم الابراج واقعدو ياكلون وكانت منار وايد مستانسه مع علي
علي : أول مره اتيين اهني ؟
منار : اي
علي : ( يبتسم ) انا راح اوديج كل الاماكن اللي مارحتيلها
منار : الله يخليك لي يارب
علي : ويخليج لي يا أم جاسم
منار : ( تظحك ) لو كان ولد بتسميه جاسم ؟
علي : اي على اسم ابوي
منار : واذا بنت ؟
علي : شنو اسم امج ؟
منار : ( ابتسمت بحزن ) نور
علي : عيل بنسميها نور
منار : الله لا يحرمني من طيبتك .. علي انت دخلت حياتي وخليت لها معنى
علي : ( مسك ايدها و اهو يبتسم ) انتي اللي دخلتي حياتي .. ييتي ركض و قطيتي عمرج جدام سيارتي يعني مو انا اللي دخلت حياتج
منار : ( تظحك ) علي عااد خلك شوي جد
علي : ( يبتسم ) دوم هالظحكه يارب
----
فهد : راح اخليه يكره الساعه اللي انولد فيها
ناصر : خلاص خلهم يولون لا اهي اختنا ولا نعرفها
فهد : لا بخلي هالكلب يعيش طول حياته مقهور مثل ما وطى راسي وخلاها تنحاش من البيت
ناصر : اي قولي اشبتسوي ؟
فهد : لا ماراح اقولك بس بعدين لي صار اللي ابيه راح اناديك عشان تبرد جبدك معاي
ناصر : فهد تعوذ من ابليس لا يكون بتذبحه ؟
فهد : لا والله بس راح يتمنى لو اني ذبحته
-------
علي : مابقى شي وندش سنه يديده وابي نكون بره الكويت اشرايج ؟
منار : ( تبتسم اعجبتها الفكره ) وين يعني ؟
علي : مادري كيفج بس اللي راحو ايطاليا يمدحونها
منار : تدري اني ماسافرت الا مره وحده مع امي
علي : وين رحتو ؟
منار : دبي
علي : ماودج اتروحين البحرين ؟
منار : ( ساكته )
علي : انا راح اوديج بس عقب ماتولدين عشان ناخذه معانا
منار : ( ابتسمت ) مادري والله بس مو متشجعه
علي : ميخالف اهو اول شي بـ.. ( رن تلفونه )
علي : ( يبتسم حق منار ) هذي حبيبتي الثانيه
منار : ( انصدمت ) منو ؟
علي : ( يتكلم بصوت واطي ) هلا حبيتي اشلونج يا عمري ولهت على صوتج .. عطيني بوسه يالعسل
منار : ( منصدمه واتطالعه )
علي : ( يظحك ) زين يمه لاتزفين اتغشمر معاج
منار : ( من الحره طقته بالشوكه على ايده )
علي : لحظه يمه .. ( يظحك و يكلم منار) تره هذي ايد مو خشب
منار : احسن عشان تبطل هالحركات
علي : ( يبتسم لها ويرد يتكلم بالتلفون ) اي يمه معاج والله .. شنو الموضوع ؟
علي : والله ابوي قال جذي ؟
علي : اكيد بنيي .. على خير مع السلامه ( سكر الخط )
منار : اشقالت ؟
علي : ( يبتسم ) ابوي قال ان لازم نسكن عندهم بالشقه اللي فوق
منار : ( ابتسمت وماقالت شي )
علي : منور تضايقتي ؟؟ تره والله ابوي قلبه طيب لاتحاتين ومع الايام بيحبونج .. واحسلج عشان لا تقعدين بروحج اذا طلعت
منار : اللي تشوفه
علي : لا .. اللي انشوفه اثنينه .. وابي رايج الحين
منار : ( تبتسم ) معاك حق لازم نروح وبخليهم يحبوني غصب
علي : كفوو .. هذي مرتي العسل

** البارت الثامن والعشرون **

علي : ( يبتسم ) ابوي قال ان لازم نسكن عندهم بالشقه اللي فوق
منار : ( ابتسمت وماقالت شي )
علي : منور تضايقتي ؟؟ تره والله ابوي قلبه طيب لاتحاتين ومع الايام بيحبونج .. واحسلج عشان لا تقعدين بروحج اذا طلعت
منار : اللي تشوفه
علي : لا .. اللي انشوفه اثنينه .. وابي رايج الحين
منار : ( تبتسم ) معاك حق لازم نروح وبخليهم يحبوني غصب
علي : كفوو .. هذي مرتي العسل
------
( علي ومنار راحو البيت واقعدو يشيلون اغراضهم بجناط سفر كبار ومنار مبين عليها انها وايد خايفه من حياتها اليديده في بيت اهل علي )
علي : ( مسك منار ولمها ) حياتي لاتخافين والله اعرف اهلي بس عطيهم وقت وصدقيني بيحبونج مثل مايحبون عالية
منار : ( واهي حاطه راسها على صدره ) يارب يكون كلامك صح والله اني فاقده حنان الأهل
علي : راح تحسين فيه .. بس عطيهم وقت
منار : ( كملت ترتيب الملابس بالجناط ) متى انروح لهم ؟
علي : متى ماحبيتي
----
ادخلو البيت الساعه 9 بالليل وام علي رحبت فيهم ولمت ولدها وباسته وسلمت على منار سلام عادي ( خد بخد )
علي : يمه وين ابوي ؟
ام علي : مو اهني طالع .. حياكم
راحو اقعدو بالصاله وام علي قالت حق الخدم يصعدون جناطهم الدور الثالث
ام علي : اشلونك يمه شمسوي ؟
علي : الحمدلله بخير ومستانس بزواجي
( منار استحت واقعدت اتطالع علي واهي منحرجه من امه )
ام علي : تستاهل كل خير
علي : عيل وين الباجي ؟
ام علي : عثمان مسافر وعمور نايم و عالية تدرس باجر عندها امتحان اناديها ؟
علي : لا لا خليها تدرس .. وعثمان حتى ماكلف نفسه يرفع السماعه ويقولي ان مسافر ؟
ام علي : آنا زين دريت كل شي صار بسرعه ابوك طرشه عالشركه بلبنان
( منار ساكته اتطالعهم وحاسه انها تعبانه )
ام علي : وانتي منار اشلونج ؟
منار : الحمدلله بخير
علي : ( لاحظ انها تعبانه ) يمه احنا بنصعد نرتاح
ام علي : اي حبيبي اخذو راحتكم باجر قعدو تريقو معانه
علي : ( يظحك ) يمه الله يهداج شيقعدنا الساعه 7 الصبح .. تريقو انتو احنا ريوقنا الساعه 9
ام علي : وليش ماتداوم مع ابوك ؟ بعد صار عندك بيت لازم تشتغل
علي : انا ناوي اشتغل بعد العطله ان شاءالله .. ويللا تصبحين على خير
---
اصعدو فوق و اقعدت منار اتطالع المكان فيه صاله وحمام وغرفة نوم .. كانت اصغر من شقتهم بس اثاثها احلى
علي : ها ؟ ان شاءالله اعجبتج ؟
منار : ( تبتسم ) اي وايد حلوه ولو اني راح اشتاق حق شقتنا
علي : ( يبوس ايدها ) ولا يهمج لو تبين نقعد اسبوع اهني واسبوع اهناك
منار : ( تبتسم ) لا بس الويك اند نقعد اهناك
علي : ( يظحك ) حشى مخيم مو شقه
----
عالية : خلاص فهد والله جذي تحرجني
فهد : و ارد اقولها احبج واحبج وهم احبج وناطرج اتقولينها لي
عالية : ماراح اقول شي خلاص عاد
فهد : اليوم بسكت عنج بس راح تقولينها لي مع الأيام .. ولا تره انتحر
عالية : ( تظحك ) وانت كله تبي تنتحر ؟
فهد : اي اذا عالية ماتحبني مثل ما احبها بعد ماله داعي اعيش
عالية : ( انحرجت ) زين فهد انا لازم اودي التلفون حق امي وبنام لأن باجر عندي امتحان اول حصه
فهد : اوكي حبيبتي نوم العوافي شدي حيلج باجر الصبح بتلقيني عند باب المدرسه عشان تشوفيني وتحلين الامتحان عدل
عالية : ( تظحك ) اوكي يللا مع السلامه
فهد : مع السلامه
-----
- الصبح على الريوق -
ابو علي : المعاريس للحين نايمين ؟
ام علي : اي .. يقومون الساعه 9
ابو علي : ليش بيتنا فندق ؟
عالية : ( تاكل وتطالعهم ) يللا يبه تأخرت وراي امتحان
ابو علي : ( يتحلطم وقام طلع )
عالية : ( باست امها واطلعت )
ام علي : عموري حبيبي .. اليوم ماراح تروح الحضانه
عمر : ( يشرب عصير ) ليش ؟
ام علي : عشان بعد شوي راح انشوف علي
عمر : ( وقف وقعد يناقز ) علييي
ام علي : اي اهو الحين نايم فوق اذا قام راح ينزل وتشوفه
عمر : ابي اروح حق علي ( يركض بيصعد فوق )
ام علي : لا اقعد اهو يقوم بروحه بعد شوي
عمر : ( يبجي الا يبي يصعد )
ام علي نادت الخدامه عشان تودي عمر فوق حق شقة علي
عمر صعد معاها واول ما اوصلو الشقه قعد يطق الباب وينادي
( علي نايم حاط راسه على جتف منار )
منار : ( بطلت عينها و اهي خايفه ودزت علي عنها ) علي قووم
علي : ها منو شنو فيه ؟
منار : الباب
علي : ( قام طلع من الغرفه واهو يصارخ ) منو واشفيكم جذي اتطقون الباب
( منار البست الروب واقعدت عالسرير )
( علي بطل الباب جان عمر يقط نفسه عليه ويلم ريوله )
علي : ( ظحك وشاله ) اهليين بالبطل اللي مقعدني من الصبح
( راح لي الغرفه وطق الباب )
علي : منور معاي ريال قوي بيدش يسلم عليج اوكي ؟
منار : ( اظحكت درت ان هذا عمر ) اي اي حياكم
( علي قعد يمها عالسرير وعمر قاعد بحضنه واهو يطالع منار وساكت مايتكلم .. جان تسولف معاه مده لين خذا عالوضع وقعد يقرق )
علي : الحين انسي يخليج تنامين
منار : ( تظحك ) يهبل الله يحفظه
علي : ( يبتسم ويطالعهم ) حبيبتي بتردين تنامين ؟
منار : لا
علي : عيل انا بدش اسبح وبنزل اقعد مع امي اتيين ؟؟
منار : اي انا بعد بسبح وبعدين الحقك
علي : ( يبتسم ) اشرايج نختصر الوقت واندش نسبح وننزل نقعد مع امي ؟
منار : ( ويهها صار احمر وانحرجت و أشرت على عمر )
علي : ( يظحك ) هذا زين يفهم شنو يعني نسبح
عمر : ( يطالعهم ) ماما سبحتني شم شعري ( حط راسه بويه علي )
منار : ( اظحكت ) واتقول مايفهم اسم الله عليه يعرف كل شي ولا تتكلم جدامه مره ثانيه
علي : ان شاءالله .. ويللا يا اخ عمر روح حق ماما وانا بعد شوي انزل
---
ابو علي نزل عالية عند باب المدرسه ومشى .. بس اهي مادشت .. واقعدت تتلفت لين شافت فهد قاعد بسيارته ابتسم وأشر لها عشان اتدش المدرسه .. جان تبتسم له و راحت داخل ..
----
علي ومنار دشو الصاله لقو ام علي قاعده وعمر يشوف كرتون بالتلفزيون
علي باس راس امه ومنار سلمت عليها واقعدو يمها
ام علي : صباح الخير ان شاءالله نمتو عدل ؟
علي : ( يطالع منار ويبتسم ) اي الحمدلله
ام علي : يمه انا مفكره اسوي لكم حفله بالبيت ونعزم فيها معارفنا وتكون مثل عرس صغير اشرايكم ؟
علي : اي انا بعد مفكر بهالشي بس مو الحين .. لأن نبي نسافر شهر عسل ( يطالع منار ويبتسم ) واذا رجعنا انسويها ان شاءالله
ام علي : ( اقعدت تطالع منار ) ... على راحتكم
( تم علي يسولف مع امه .. ومنار اكثر شي ساكته او تسولف مع عمور )
----
بالليل يالهم عمهم بوسالم مع اعياله وعشان يتعشون عندهم وبالمره يشوفون منار
ساره : ( تساسر غلا ) ركزي عليها مو جنه عندها كرش ؟؟
غلا : مادري مايبين
ساره : بلا يبين .. مادري علي شنو شايف فيها
( عالية وندى قاعدين يسولفون مع منار )
منار : اي والله الثنوية احلى من الكلية بوايد
ندى : لا مادري انا مليت ودي بسرعه اروح الجامعه
منار : اي اذا رحتي بتفقدين ايام الثنوية وبذكرج
ساره : اللي يسمعج يقول الحين انتي كلش خلصتي الجامعه
منار : راح أكمل الكورس الياي ان شاءالله
ساره : وليش قعدتي فتره بالبيت ؟
منار : ظروف
ساره : قوليلنا ظروفج بالله .. ماورانا شي قاعدين
منار : لا ظروفي بحتفظ فيها حق نفسي
ندى : عالية اتقول انكم حجزتو وبتسافرون وين بتروحون ؟
منار : ايطاليا
ندى : متى تردون ؟
منار : مادري بس اتوقع بعد راس السنه بيومين
ندى : وناسه يعني تقريبا 3 اسابيع بتقعدون اهناك
ساره : ( تكلم غلا بصوت واطي ) وااي باطه جبدي ودي اروح اعطيها كف جدامهم
غلا : ( تظحك ) اشتبين فيها
ساره : مادري احس اني كارهتها وسوالفها مليقه قطيعه يعني تسوي روحها فاهمه بكل شي
----
مر جم يوم علي طلع سيارته من الوكاله وعثمان رجع من السفر وابو علي علاقته بارده مع منار ومايسولف معاها وعالية للحين كل يوم تكلم فهد مرتين مره العصر ومره بالليل قبل النوم .. صار وقت سفرة علي ومنار
ام علي : يمه ديرو بالكم ودقو اول ماتوصلون
علي : لاتحاتين اول ما اوصل راح اكلمكم
عثمان : يللا مافي وقت وراي شغل بقطكم وبمشي
ابو علي : توصلون بالسلامه ان شاءالله
علي : ( يبوس راسه ) الله يسلمك يبه
عالية : مو تنسوني كل شي حلو تشوفونه بطريجكم اشتروه لي
منار : ( تظحك ) ان شاءالله
علي : بييبلج شي واحد وكافي عليج
عالية : لا والله ليش يعني ؟
علي : ( ظحك و باس عمور ) وانت اييبك ايطاليا بكبرها .. ويللا كل عام وانتو بخير مقدما مع السلامه ( اطلعو راحو المطار مع عثمان )
----
عالية : اخوي ومرته سافرو اليوم
فهد : وين راحو ؟
عالية : ايطاليا .. يحظهم وناسه
فهد : انا اذا خذيتج راح اوديج أي دولة تخطر في بالج
عالية : صج ؟
فهد : اي اكيد صج .. زين عمري متى اشوفج ؟ والله ودي اقعد معاج ونتكلم بكل شي
عالية : نتكلم بالتلفون احسن .. ماقدر اطلع معاك
فهد : اي ليش يعني ؟؟ والله ودي اشوفج ولهت عليج وفترة دقيقه قبل الدوام ودقيقه بالهده ماترضيني .. انا ابي اقعد معاج على راحتي
عالية : ( ساكته )
فهد : حبيبتي عالأقل براس السنه ودي اكون معاج
عالية : متى يعني راس السنه تقصد بالليل ؟؟
فهد : ( يظحك ) لا وين قاعدين اكيد مو بالليل .. بس يعني بتاريخ 1 عالسنه اليديده ابي اقعد معاج حتى لو دقايق.. بس بعطيج هدية راس السنه
عالية : لا مابي هدية مولازم
فهد : بلى لازم وبعطيج احلى هدية بعد
عالية : واذا اسألتني امي من وين هالهدية شقول ؟
فهد : قولي من رفيجتي اصلا حتى اهلج راح يستانسون عالهدية .. ويللا الحين نامي حبيبتي وانا بعد بنام تصبحين على خير
عالية : وانت من اهله مع السلامه

** البارت التاسع والعشرون **
عالية : لا مابي هدية مولازم
فهد : بلى لازم وبعطيج احلى هدية بعد
عالية : واذا اسألتني امي من وين هالهدية شقول ؟
فهد : قولي من رفيجتي اصلا حتى اهلج راح يستانسون عالهدية .. ويللا الحين نامي حبيبتي وانا بعد بنام تصبحين على خير
عالية : وانت من اهله مع السلامه
-------
منار وعلي مستانسين بالسفره وكل يوم يكلم اهله .. وبليلة راس السنه راحو واسهرو بره وكان يوم ماينسي
علي : ( باس ايد منار ) كل عام وانتي حبيبتي
منار : ( تبتسم ) الله يخليك لنا
----
فهد : كل عام وانتي بخير ياقلبي
عالية : وانت بخير
فهد : اتحبيني ؟
عالية : ( ساكته )
فهد : يللا عااد علوويه قوليلي احبك ونسيني
عالية : ( غصب طلعت الكلمه ) أحبك
فهد : عيديها امانه ماسمعت عدل
عالية : أحبك
فهد : اشكثر ؟
عالية : قد هالدنيا كلها
فهد : عيل باجر ابي اشوفج
عالية : صعبه والله .. اشلون اطلع شقول حق امي ؟
فهد : قوليلها ان رفيجتج بتحتفل براس السنه وطلعي معاي
عالية : اصلا امي ماتحب هالاحتفالات اتقول حرام
فهد : زين قولي بتدرسين مع رفيجتج مو امتحانات الفاينل قربت ؟
عالية : اي صح
فهد : عيل خلاص بشوفج
عالية : اوكي احاول يللا لازم اسكر .. مع السلامه
فهد : باي
---
اليوم الثاني عالية قامت من النوم وراحت على طول حق امها
عالية : يمه اليوم بدرس عند خلود في بيتها
ام علي : لا خليها اهي اللي اتيي عندج ابوج وعثمان مايرضون
عالية : يمه عفيه الله يخليييج
ام علي : لا تيننوني واحد حتى بالعيد مارجع الا يصير عاشق ويحتفل براس السنه بره وانتي بتدرسين مع رفيجتج .. ماكو روحه حتى لو بتسقطين
عالية : يمه عاااد برووح انتي اقنعي ابوي عفيه
ام علي : قلت لأ خلاص ماتفهمين
عالية : ( ازعلت وراحت دارها دقت على فهد )
عالية : امي مارضت اطلع
فهد : انتي لو تبين تشوفيني جان عرفتي تقنعينها
عالية : والله كلمتها بس مارضت
فهد : ( عصب ) زين خلاص خلاص كيفج
عالية : فهد انا شكو ليش تصرخ علي والله كلمتها حاولت بس موراضيه
فهد : زين يللا الحين انا مشغول باي ( سكر الخط بويهها )
-----
مر اسبوع ورجع علي من السفر وصارت منار بشهرها الرابع بس كان بطنها صغير وكانت تلبس واسع فمايبين انها حامل وعالغدى علي قرر يقولهم
علي : يمه يبه بقولكم خبر راح يفرحكم ان شاءالله
ام علي : ( تبتسم ) منار حامل ؟؟
منار : ( ساكته ومتضايقه انها قاعده تستغفلهم )
علي : اي حامل
ام علي : ( قامت وباست منار ) مبروك حبيبتي الف مبروك
ابو علي : بالمبارك الحمدلله واخيرا بشوف اعيالك
منار وعلي : الله يبارك فيكم
عالية : يااااي راح اصير عمه وناسه عشان اطق ولدكم عالرايحه والراده
علي : اي عشان اعلقج من شعرج
عثمان : مبروك
علي : الله يبارك فيك
ام علي : تبين انأجل الحفله .. كنا مقررين نسويها باجر
منار : لا لا عادي لا تأجلونها
ام علي : على خير
( بعد الغدى منار راحت الغرفه مع علي وكان مبين انها وايد متضايقه )
علي : اشفيج حبيبتي ؟
منار : اشلون الحين اهم عبالهم توني ادري اني حامل .. وانا بالرابع شنقولهم يعني راح يلاحظون بطني واضح عالشهر الياي
علي : عادي انقول بطنج عود واذا عالولاده انقول ولدتي قبل الموعد
منار : لا ماتتصدق
علي : اذا درو بروحهم كيفهم اشبيسوون يعني ؟ خلاص طاف لا يهمج
منار : ( منزله راسها )
علي : ( رفع راسها من حنجها ) طالعيني .. وتأكدي اني بوقف معاج مهما صار
منار : ( لمت علي ) الله يخليك لي يارب
علي : ويخليج يا ام جسوم
منار : ( تظحك ) واشدراك ان جسوم .. انطر الموعد عقب باجر وراح تعرف اذا كان جسوم او نور
علي : من قدج باجر عرسج
منار : ( تظحك )
----
اليوم الثاني منار وعالية راحو الصالون كانو يصبغون شعر منار وعالية عالقنفات بعيده عنها يسوولها بدي كير ومني كير ولابسه سماعة البلوتوث و قاعده تتكلم بالتلفون
عالية : لا ماقدر
فهد : مالي شغل اليوم يا تطلعين من بيتكم اشوف كشختج او تصورين واتدزيلي الصورة
عالية : لا ماقدر
فهد : بلى تقدرين
عالية : لا عفيه ماقدر اطلع ومابي ادز صورتي
فهد : انتي ذبحتيني كله لأ كله لأ
عالية : فهد الحين لازم اسكر بيسوون شعري
فهد : اول ماتخلصين كلميني
عالية : ان شاءالله باي
----
خلصو من الصالون وارجعو البيت ومنار اصعدت فوق عشان تكمل شغلها لقت علي قاعد بالغرفه
منار : انت اهني ؟؟
( علي طالعها وكانت صابغه شعرها عسلي على اشقر وقاصته القصه اللي من وره قصير ومن جدام طويل .. وحاطه مكياج خفيف لايق على بدلتها الاف وايت كانت شاريتها من ايطاليا حق الحفله )
علي : اتيننين
منار : ( ابتسمت ) عجبك ؟؟
علي : ( باس ايدها ) يصير تكشتين فيهم وتقعدين معاي ؟؟ مولازم ننزل
منار : ( اظحكت ) اصلا انت لازم تطلع لأن بعدين راح تدخل عشان انصور .. خالتي يايبه مصوره
علي : اوكي بروح بس أول خل اساعدج باللبس واسكر السحاب
منار : علي يللا عاد روح والله اذا يو الناس خالتي بتزفك
علي : تو مأذن المغرب ماراح اييون الحين
منار : علي ؟؟
علي : عيونه
منار : ابي ادق على مها رفيجتي ابيها اتكون موجوده اليوم
علي : انا بصراحه ماحبيت هالبنت تخلت عنج يوم كنتي محتاجتها اشتبين فيها الحين ؟؟
منار : اهي مالها ذنب امها ماكانت راضيه انها تكلمني لأن اخواني سوولهم مشاكل .. بس الحين انا تزوجت وابيها اتكون موجوده وبغيت آخذ رايك قبل لا اناديها
علي : اذا حابه وجودها خلاص ماعندي مانع اهم شي اتكونين مرتاحه
منار : تسلم يارب
علي : الله يسلمج حبيبتي .. زين ها آخر كلام اساعدج ولا لأ ؟؟
منار : ( تظحك ) لا روح بسرعه قبل لا اييون الناس انا مابي البس الحين
علي : اوكي بس خل البس دشداشتي وغتري واروح
----
عالية : فهد خلاص عاد ماراح اصور ولا اطلع
فهد : عيل ليش تجذبين وتقولين انج تحبيني ؟
عالية : احبك والله بس ماقـ..
فهد : لاتقولين ماقدر .. لج دقيقتين اذا مادزيتيلي الصوره ما راح اتشوفين رقمي ( سكر الخط بويهها )
عالية : ( أول ماسكر التلفون بويهها دقت على خلود ) الو متى اتيين ؟
خلود : تو الناس ليش ؟
عالية : فهد يبيني اصور شكلي بالمكياج والملابس وادز له صورتي وقلتله لأ جان يزعل وسكره بويهي
خلود : مو تقولين يهبل وسوالفه حلوه وطيب ؟؟ دزيله عيل
عالية : بس مادري خايفه
خلود : اهو مو ثقه ؟؟
عالية : بلى بس مادري
خلود : زين كيفج سوي اللي تبين انا بالصالون باقيلي شغل وايد
عالية : خلود زين شسوي ؟؟
خلود : سوي اللي تبين وخليني جذي ماراح اييلكم ولا الساعه 11 باي ( سكرت الخط )
عالية : هذيله اشفيهم كل واحد مسكره بويهي من صوب
( شوي دشت منار على عالية )
منار : عالية حبيبتي سكريلي السحاب
عالية : ( قامت تسكر لها السحاب ) انتي خلصتي وانا للحين مالبست
منار : اي لبسي اشناطره بعد شوي بييون الناس اصلا قاعده اسمع اصوات تحت اتوقع ندى وخواتها يو
عالية : عيل خل البس بسرعه ( اقعدت اتطالعها )
عالية : واااي منوور شكلج يهبل بس قصة الملابس واسعه شوي
منار : احسن عشان يكون مريح اكثر .. بس مادري احس مرتبكه وايد
عالية : ( تظحك ) بالعكس وناسه الكل يطالعج
منار : لا والله احساس يخوف .. زين انا بروح اسوي اللمسات الأخيره
عالية : لا وين تروحين انا ساعدتج وانتي تنحاشين لحظه خل البس وسكري السحاب
منار : زين بسرعه عفيه
( عالية راحت تلبس بطرف الغرفه جان يرن تلفونها وكان يم منار قرت عالشاشه مكتوب خلود )
منار : خلود قاعده تدق عليج ارد اقولها انج تلبسين ؟
عالية : ( صرخت ) لا لاتردين عليها
منار : ( استغربت واسكتت )
عالية : ( خلصت لبس ويت يم منار ) آسفه صرخت عليج بس اهي تنحرج ماتحب احد يرد عليها
منار : اوكي ماقلت شي على راحتج ويللا عطيني ظهرج خل اسكر السحاب وراي شغل
( عالية لفت وخلتها تسكره لها )
منار : يللا انا رايحه ( اطلعت من الغرفه )
عالية : ( دقت على فهد ) الو .. مرت اخوي كانت اهني ماقدرت ارد .. وتفشلت منها حييل تخيل كانت بترد عليك لأني مسجلتك خلود بس صرخت عليها حدي مفتشله منها
فهد : زين خل تولي ماعلينا منها وين الصوره ؟
عالية : اوكي خلاص بصور الحين وادزها
فهد : يللا ناطرج
( سكرت التلفون وصورت صوره حلوه ودزتها له شوي جان يدق )
فهد : اتهبلين حبيبتي والله طالعه قمر اقري على نفسج لا يحسدونج
عالية : ( تظحك ) بس عاد والله انحرج
فهد : اي والله صج اقري المعوذات
عالية : ان شاءالله يللا لازم انزل باي
فهد : باي حبيبتي
فهد : ( سكر الخط وقعد يطالع الصوره ) والله انج حلوه ياعالية بس مشكلتج انج اخت الحقير اللي خله اختنا توطي راسنا جدام الناس
----
انزلت منار وعالية تحت والكل قاعد يطالع منار
ساره : وااي حارتني طاع ملابسها وايد وساع ماعندها ذوق
غلا : حرام عليج والله ان شكلها حده حلو
ساره : جبي من وين حلو الا تلوع الجبد
غلا : ( تظحك ) الحمدلله والشكر خلاااص اشفيج علي تزوجها ويحبها الله يهنيهم وان شاءالله اييلج نصيب احسن منه
ساره : اقول ذلفي والشرهه عاللي قاعد يسولف معاج خل اروح عند عالية وندى
( منار قاعده تتلفت اتدور اذا مها اوصلت او لأ بعد فتره لقتها داشه الصاله ويت لها وفاتحه ايدها عشان تلمها )
منار لمتها فتره طويله وثنتينهم دمعو
مها : ( تمسح دموعها ) خلاص هاج كلينكس لا يخترب مكياجج وتره انا آسفه والله اني احبج وانتي تدرين بس ماكنت أقـ..
منار : ( تمسح دموعها قبل لا تطيح وتخرب المكياج ) خلاص لا تقولين شي انا نسيت السالفه
مها : لا لازم اقول .. انا والله كنت بوقف معاج بس امي مارضت والله اني كنت احاتيج وكل يوم ابجي والحمدلله الحين انتي خذتي واحد زين واهله زينين وعندهم خير الف حمدلله
منار : الحمدلله .. والله ان علي مافي مثله
مها : منار مادري اشلون اقولج بس يمكن انتي فهمتي أحمد غلط
منار : ( انصدمت يوم اسمعت اسمه ) مها الله يخليج لا تيبين طاري احمد آنا خلاص تزوجت ومستانسه مع علي
مها : بس تره احمد رجع وقاعد يدورج
(( منار حست بدوخه وماقدرت توقف اكثر جان تقعد على القنفه وغمضت عينها ))

مشكووووووووووورة

تقبلي مروري

العفو
مشكورة على المرور العطر